Blaðamaðurinn skeleggi Jakob Bjarnar Grétarsson segir sínar skoðanir umbúðalaust á samfélagsmiðlinum Facebook:
„Íslensk pólitík er skrítin skrúfa. Margir flokkanna vilja tala um sig sem frjálslynda. En eru á sama tíma djúpt sokknir í dyggðaskreytingar og að sverja pólitískum rétttrúnaði hollustu sína.“
Segir einnig að „við hins vegar skilgreinum fyrirbæri ekki út frá fagurgala heldur gjörðum og aðferðum sem menn aðhyllast. „Commitment is an act, not a word,“ sagði Sartre.
Forræðishyggja er aðferðafræði rétttrúnaðarins,“ segir Jakob Bjarnar og bætir þessu við:
„Kynjakvótar, til að mynda, eru kristaltær forræðishyggja og afar andlýðræðislegt fyrirbæri. Forræðishyggja og frjálslyndi eru andstæðrar merkingar rétt eins og svart og hvítt, já og nei. Niðurstaðan er geggjuð.“
Bætir við að lokum:
„Eini flokkurinn sem hefur þótt of púkó fyrir rétttrúnaðarseggina að leggjast á og leggja undir sig er Framsóknarflokkurinn. Sem telst þannig óvænt frjálslyndasti flokkur Íslands! Fyrir gráglettni örlaganna. Alveg óvart. Og ég fyrir mína parta efast ekki um að það er ástæðan fyrir kosningasigrum xB í undanförnum kosningum. Sem enginn virðist botna í.“