„Þetta verður spennandi verkefni, við erum sex sem erum að fara héðan frá Íslandi til að aðstoða menn í Úganda við að malbika alþjóðaflugvöll í vestanverðu landinu,“ segir Stefán Már Guðmundsson yfirverkstjóri hjá Colas á Íslandi sem er eitt helsta malbikunarfyrirtæki á landsins. Íslendingarnir munu sinna ráðgjafastörfum auk þess að hafa eftirlit með framkvæmdinni. Kabaale international airport er nýr flugvöllur nærri landamærum Úganda við Kongó. Fundist hefur olía á svæðinu og því verið að gera stóran flugvöll fyrir fólk og frakt.
Víkingaflokkurinn fenginn í verkið
„Colas í Bretlandi er með verkið en vantaði menn sem væru til í þetta ævintýri, hefðu þekkingu, getu og væru til í allt. Lars Jensen frá Colas í Danmörku starfaði með okkur hérna á Íslandi um tíma, meðal annars þegar við malbikuðum alþjóðaflugvöllinn í Keflavík. Hann lagði til að víkingaflokkurinn frá Íslandi yrði fenginn í þetta, áður hafði hann fengið okkur til að hlaupa undir bagga með sér í Danmörku þannig að hann veit vel hvað við getum gert. Svo má ekki gleyma að við malbikuðum flugvöllinn í Paamiut í Grænlandi. Þannig að við erum ýmsu vanir við allskonar aðstæður. Það er líka frábært fyrir okkur að fá svona verkefni yfir harðasta veturinn á meðan við höfum nær ekkert að gera hérna heima enda malbikun bara sumarvinna, nema auðvitað við miðbauginn. Þetta er fyrst og fremst útflutningur á þekkingu,“ segir Stefán Már fullur tilhlökkunar að takast á við miðbaugsmalbikun í Afríku.
Munum njóta miðbaugssólarinnar
Áætlað er að Íslenski ráðgjafaflokkurinn frá Colas verði mánuð í Úganda en Stefán segir það geta brugðið til beggja vona eins og oft er með framkvæmdir. „Við klárum okkar verkefni vel á fjórum vikum en það er háð því að flugvöllurinn verði kominn og tilbúinn fyrir malbik,“ segir þessi bjarti og skemmtilegi malbikari sem hlakkar til miðbaugssólarinnar laus við að skafa rúður á frostköldum morgnum heima á Íslandi.