Söngkonan og flugfreyjan Elísabet Ólafsdóttir, Lísa, heldur tónleika í kvöld klukkan 20.30 ásamt Guðrúnu Ólu Jónsdóttur og Hlyni Þór Agnarssyni píanóleikara í Lindakirkju. Lísa mun flytja frumsamið efni meðan Gógó tekur íslenskt í bland við þekktar erlendar power-ballöður.
Lísa gaf nýlega út lagið Hitti þig í draumi sem finna má á Spotify.
Hvar líður þér best? „Mér líður best heima og í faðmi fjölskyldunnar, þó að ég starfi sem flugfreyja er ég rosalega heimakær.“
„Sturluð“ staðreynd? „Ég fór í tannlæknanám í Þýskalandi en hætti í byrjun annar númer tvö af því að ég vildi ekki kryfja hausinn á látnum Þjóðverja í heila önn.“
Hvert er þitt mesta afrek? „Ég ætla að segja að það að vera mamma drengjanna minna sé mitt mesta afrek, það getur tekið á að vera móðir og reyna að halda mörgum boltum á lofti í einu í hversdagsleikanum, jafnvel þótt börnin séu yndisleg og góð, og sinna öllu öðru sem þarf að sinna.“
Bakstur eða eldamennska? „Eldamennska, elska að elda. Maður verður að vera í núinu þegar maður eldar og svo er viss sköpun fólgin í því líka svo það getur verið mjög gefandi.“
Stundarðu íþróttir? „Já, aðallega sund og hlaup. Hef verið dugleg að mæta á garpaæfingarnar í sundi hjá Breiðabliki í vetur. Breiðablik er auðvitað besta liðið.“
Hver var fyrsta vinnan þín? „Fysta vinnan mín var unglingavinnan eins og hjá svo mörgum, annars var ég búin að passa börn eitthvað áður.“
Hvað er það leiðinlegasta sem þú gerir? „Sko … ég er mjög góð í að sjá það jákvæða í hlutunum en ég næ því samt ekki alveg alltaf – ég til dæmis get varla straujað því mér finnst það svo drepleiðinlegt.“
Hvaða þætti ertu að horfa á? „Var að klára ,,The Crown“ og verð að finna mér eitthvað nýtt að horfa á.“
Hvaða sögufrægu manneskju myndir þú vilja hitta? „Ég myndi vilja hitta Jesú, ekki spurning.“