Föstudagur 23. september, 2022
9.1 C
Reykjavik

Lára Guðrún barðist fyrir lífi sínu á liðnu ári: „Þetta var algert helvíti“

Helgarviðtalið

- Auglýsing -

Orðrómur

- Auglýsing -

Lára Guðrún Jóhönnudóttir er ansi fegin því að árið 2020 er að baki. Ár þar sem hún barðist fyrir lífi sínu og var algert helvíti að hennar sögn. Í raun var það svo erfitt að hún óttaðist dauðann í árslok.

Það má með sanni segja að síðasta ár hafi verið Láru erfitt þar sem hún glímdi við mikinn heilsubrest og hvert áfallið á fætur öðru dundi yfir. „Maður heldur bara áfram að braggast, þetta er skref fyrir skref. Ég vonast til að þetta fari allt saman vel en tekur bara sinn tíma,“ segir Lára í samtali við Mannlíf.

Lára skilur ekkert í hversu erfitt læknum reyndist að finna út hvað var að.

Lára lýsir hörmungarárinu í færslu á Facebook. „Síðasta ár var algert helvíti. Það var svo erfitt. Svo erfitt að ég átti alveg eins von á því að deyja fyrir árslok. Ég flakkaði á milli lækna með A4 blað af einkennum og ég fékk alltaf sama svarið: “Þetta er bara streita”. Það hlustaði enginn á mig og ég var á tímabili búin að sannfæra sjálfa mig um að ég væri bara með svona svakalega laskað miðtaugakerfi að ég væri einfaldlega að tapa vitinu,“ segir Lára og heldur áfram:

„Það var ekki fyrr en ég hafði misst 14 kíló, helminginn af hárinu, komin með alvarlegar sjóntruflanir, búin að missa alla tilfinningu í fótunum, með djöflaþorsta allan sólarhringinn og svo mikla mæði að ég komst varla upp tröppurnar heima hjá mér, að hjúkrunarfræðingur stakk upp á því að ég myndi óska eftir mælingu á langtímasykri (HBA1C).“

„Mér leið stundum eins og ég myndi sofna og aldrei vakna aftur.“

Það var svo á Þorláksmessu sem Lára var kölluð inn á Landspítalann. Þar segist hún hafa fengið jólagjöfina sína, gjöf sem hún hefði óskað sér að fá ekki. „Sykursýki 1. Send heim með bunka af bæklingum, insúlínsprautur, nálar, blóðhnífa og blóðsykurmæli. Og boðin velkomin á innkirtladeildina fyrir lífstíð. Þessi jól og áramót hafa verið vægast sagt krefjandi fyrir mig og fjölskylduna mína. Blóðsykurinn minn var orðinn svo hár að talan komst ekki fyrir á “HRINGDU Á LÆKNI STRAX ÞÚ ERT Í HÆTTUÁSTANDI” plakatinu sem hékk á veggnum á spítalaherberginu,“ segir Lára.

„Ég man hvað ég fann það sterkt hversu veikburða ég væri orðin þegar ég fékk hana í fangið. Hún var nokkurra sólarhringa gömul, fullkomið ljós, full af lífi. Og ég var fullkomin andstæða. Að veslast upp. Að berjast fyrir lífi mínu. Hanna Lillý bjargaði lífi mínu.“

Lára var kominn í það mikið hættuástand að hún þurfti að vakna á tveggja klukkustunda fresti yfir hátíðirnar til að sprauta sig með insúlíni og því miður hefur hún orðið fyrir óafturkræfum skaða vegna veikindanna. Hún botnar ekkert í því hversu lengi læknar voru að greina hvað hráði hana. „Mér leið stundum eins og ég myndi sofna og aldrei vakna aftur. Það er langur vegur framundan og ég vonast til þess að endurheimta sem allra mest af fyrri styrk, en það er þó einhver skaði sem hefur orðið vegna sjúkdómsins sem er því miður ekki afturkræfur. Við erum ennþá í áfalli yfir því hversu langan tíma það tók að komast til botns í þessu. Það er samt algerlega á hreinu að það fær enginn læknir að segja við mig aftur að ég þjáist “bara af streitu”. Ég þekki líkama minn best og hef áður bjargað lífi mínu með innsæinu og með því að hlusta á hvað hann er að segja mér,“ segir Lára og bætir við:

Láru bíður nú langt bataferli en hún vonast til að ná sem mestu af kröftum tilbaka.
- Auglýsing -

„Það sem ég lærði á síðasta ári er að líkaminn minn er sterkur. Hvöt mín til að lifa af er hvöt sem hefur búið inní mér í þúsundir ára. En mikið andskoti er ég orðin þreytt. Þannig að núna ætla ég að eiga í heitu ástarsambandi við insúlín og blóðsykurstjórnun. Ég læri nú ennþá betur á líkamann minn. Og ég mun hafa enn betri yfirsýn. Að hafa vald yfir blóðsykrinum er vald sem ég ætla nú ekki að syrgja mikið eða lengi að hafa fengið í fangið, sem var faktískt séð fullt fyrir, ég verð bara að stækka faðminn ennþá meira. En akkúrat núna erum við fjölskyldan í aðlögun og þetta er töff. Verulega töff.“

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 

Lestu meira

- Auglýsing -

Veistu meira um málið?

Endilega láttu heyra frá þér!
Frjálst er að senda nafnlausa ábendingu en netfang þarf að vera útfyllt.
Fullum trúnaði er heitið.

Deila

Nýtt í dag

Mest lesið í vikunni

Í fréttum er þetta helst...

- Auglýsing -