Leifur S. Garðarsson skólastjóri hefur verið settur af sem körfuboltadómari hjá Körfuknattleikssambandi Íslands, KKÍ. Ástæðan eru ósæmileg samskipti hans við kvenkyns leikmann sem áttu sér stað á samskiptamiðlum snemma árs í fyrra.
Samskipti Leifs við leikmanninn voru á þann veg að stíga í vænginn við viðkomandi sem síðan kvartaði undan því við KKÍ. Samkvæmt óyggjandi heimildum Mannlífs hefur hann verið settur af sem dómari hjá sambandinu og þar hefur hann ekki dæmt leik frá því málið kom upp.
Leifur er maður sem er vanur valdastöðu gagnvart mörgum. Hann er starfandi skólastjóri í Áslandsskóla, var lengi knattspyrnuþjálfari og jafnframt körfuboltadómari. Leifur er eini vani dómari KKÍ frá því í fyrra sem er ekki í niðurrröðun dómaranefndar í ár en fram til þessa hafði hann gefið þær skýringar að hann væri meiddur.
DV greindi frá titringi innan KKÍ vegna málsins en nafngreindi þar ekki dómarann. Í samtali við Mannlíf þvertók Leifur aftur á móti fyrir það að vera sá dómari sem um ræðir. Aðspurður hvort hann hafi reynt við leikmann gegnum samskiptamiðla segist hann ekki taka þátt í slíku. Skömmu eftir að samtalinu lauk hafði hann aftur samband og vildi þá að ekkert yrði haft eftir honum um málið.
Veistu meira um málið? Fullum trúnaði er heitið. Mannlíf tekur við ábendingum, myndböndum og myndum á [email protected].