Mathús Garðabæjar er komið í hendur nýrra eigenda. Nokkur leynd hefur ríkt um kaupin undanfarnar vikur. Á samfélagsmiðli staðarins hafa margir forvitnast um hina nýju eigendur og hvort útgefin gjafakort séu enn í gildi. Fátt hefur verið um svör.
Nýju eigendurnir
Mannlíf opinberar nú eigendur og rekstraraðila Mathúss Garðabæjar. Þekktir KR-ingar meðal nýrra eigenda. Fyrrverandi landsliðsmenn í körfuknattleik, þeir Jón Arnór Stefánsson og Fannar Ólafsson eru meðal eigenda samkvæmt heimildum Mannlífs og halda saman á fimmtungshlut. Þeir hafa báðir fagnað fjölmörgum Íslandsmeistaratitlum með KR. Jón Arnór að margra mati besti körfuknattleiksmaður Íslands. Eiginkona Jóns Arnórs mun vera uppalinn Garðbæingur. Meðal annarra eigenda er Andri Gunnarsson sem nýlega keypti einbýlishús Róberts Wessman á Arnarnesinu líkt og Mannlíf greindi frá.
Einar sér um rekstur
Rekstur staðarins verður í höndum Einars Sturlu Möinichen, fyrrum eiganda Hressingarskálans (Hressó) og eiginkonu hans. Aðrir eigendur, samkvæmt heimildum Mannlífs, eru þeir Leifur Steinn Árnason, Kristján Grétarsson og Þórður Kolbeinsson stjórnarmaður í KR og einn af eigendum Unbroken, sem vinnur vinsælt fæðubótarefni fyrir íþróttamenn úr norskum eldislaxi.
Undirheimamenn
Mathús Garðabæjar hefur verið einn öflugasti stuðningsaðili körfuknattleiksdeildar Stjörnunnar undanfarin ár og hefur notið velvildar bæjarbúa. Rekstur Mathússins mun hafa verið í þungur undanfarin misseri eftir að þjóðþekktur athafnamaður með tengsl við undirheima hóf að venja komur sínar á staðinn. Heimildir herma að gestum hafi fækkað jafnt og þétt á þessu ári. Fyrr á árinu mun hafa komið til handalögmála milli athafnamannsins og annars þekkts undirheimamanns er búsettur er í Garðabænum.
Sögusagnir hafa verið á kreiki um að viðkomandi aðili, sem hefur undanfarið byggt hús á Arnarnesinu, hafi jafnvel haft eignatengsl við staðinn eða vinasamband við fyrrum eiganda, Stefán Magnússon. Samkvæmt heimildum Mannlífs eiga þær sögur ekki við rök að styðjast. Stefán er áfram eigandi veitingastaðarins Sjáland Matur & Veisla í Garðabænum. Á samfélagsmiðli staðarins hafa verið boðaðar breytingar á matseðili og virðast eigendaskiptin og breyttar áherslur leggjast vel í bæjarbúa ef marka má kommentakerfi síðunnar.