Linda Pétursdóttir athafnakona og fyrrum Ungfrú Ísland og Ungfrú Heimur hefur nú stofnað Facebookhóp sem heitir einfaldlega Linda Pé.
„Í tilefni stórra tímamóta framundan hjá mér ákvað ég að setja á laggirnar hóp fyrir konur hér á Facebook,“ segir Linda á Facebook-síðu sinni. En af hvaða tilefni ákvað hún að stofna hópinn?
„Ég verð fimmtug á morgun, það eru tímamótin!,“ segir Linda í samtali við Mannlíf. „Hópurinn er gjöf frá mér til íslenskra kvenna með það að markmiði að ég geti hugsanlega gefið af mér til þeirra með þeirri reynslu sem ég hef gengið í gegnum og að sjálfsögðu það sem ég kann og hef menntun og reynslu í varðandi heilbrigðari lífstíl.
„Ég er einmitt núna í enn einu náminu, nú að bæta við mig sem á ensku kallast Life and weightloss coaching. Veit ekki um neitt nógu gott heiti yfir það á íslensku. Fín viðbót við heimspeki, hagfræði og stjórnmálafræði,“ segir Linda, en hún útskrifaðist úr því námi frá Háskólanum á Bifröst nú í sumar.
„Við ætlum að taka fyrir heilsu, andlega sem og líkamlega. Hvernig við getum bætt vellíðan í daglegu lífi. Ég mun eflaust koma inn á áskoranir í lífinu og hvernig við komumst í gegnum þær, ég hef þokkalega reynslu þar sjálf og hef farið í gegnum ýmistlegt og get hugsanlega deilt reynslu minni og ráðum.“
Hópurinn er eingöngu fyrir konur og það kostar ekkert að vera með.