UPPFÆRT: Ingibjörg er komin í leitirnar og þakkar Írena McCabe öllum þeim sem veittu lið við leitina nú í dag fyrir. „Ingibjörg er fundin og komin undir læknishendur,“ segir systir hennar á Facebook nú rétt í þessu. „Er meir og þakklát fyrir ótrúleg viðbrögð og alla góðvildina og aðstoðina við leitina“.
„Þetta er systir mín, hún Ingibjörg Ósk Einarsdóttir. Hún er búin að kljást við alvarlegt þunglyndi seinustu 5 ár með tilraunum til að taka eigið líf.“
Á þessum orðum hefur Írena McCabe neyðarákall til almennings nú í dag gegnum Facebook, en enginn veit hvar Ingibjörg er niðurkomin hér og nú. „Í dag útskrifaði hún sig sjálf, gegn læknisráði, út af geðdeild Landspítala og hefur látið sig hverfa og er með slökkt á símanum sínum.“
Lögreglu hefur verið gert viðvart og leita vinir sem fjölskylda að Ingibjörgu einmitt nú. „Fjölskylda og lögreglan eru að leita að henni og ég bið ykkur, elsku vinir og vandamenn að deila og hafa augun opin,“ segir Írena ennfremur í neyðarákalli.
Ingibjörg ekur á KIA Picanto bíl með númeri ER-A98 að sögn Írenu og er almenningur beðinn að láta lögreglu vita umsvifalaust, verði einhver var ferða hennar.