Margrét Erla Maack, dansdrottning, skemmtikraftur og gleðigjafi, á von á sinu fyrsta barni ásamt kærasta sínum Tómasi Steindórssyni.
Þar sem Margrét er með bæði eigin rekstur sem verktaki og fær einnig laun sem launþegi þá hefur hún átt í ótal samskiptum við Fæðingarorlofssjóð um hvort hún eigi rétt á greiðslum þaðan, hversu háum og við hvaða tímabil bæturnar reiknast.
Hefur Margrét tjáð sig um það á Facebook-síðu að svör eru misvísandi eftir því hvaða einstakling hún talar við hjá sjóðnum.
„Undanfarna mánuði hef ég tjáð mig um fæðingarorlofssjóð og óskýr svör sem ég fæ þaðan. Nú eru um tvær vikur í okkar konu og ég hef enn ekki fengið konkret svör um hvaða tímabil koma til útreikninga – en eitt veit ég: Sama hvernig það er reiknað fell ég milli stafs og hurðar vegna þess að ég er stundum launamanneskja í stuttum verkefnum og stundum sjáfstætt starfandi,“ segir Margrét.
Tvær vikur í settan dag og engin svör
Að sögn Margrétar er staðan sú núna þegar tvær vikur eru í settan dag og enn engin skýr svör komin frá sjóðnum að hún sér sér ekki annað fært en að óska eftir aðstoð frá vinum og velunnurum og hefur hún sett söfnun í gang á Karolina Fund.
„Ég hef hent því fram í gríni að hópfjármagna einfaldlega orlofið mitt og eftir því sem ég grínast meira og meira með það varð það alltaf betri og betri hugmynd. Svo, kæru vinir: Gjörið svo vel. Danstímar, skemmtiatriði og veislustjórn á útsöluverði og verður framið að orlofi loknu.“
Þakkar Margrét fyrir allan stuðning við söfnunina og segist vonast til að hún vekti athygli á málinu.„Þar sem Karolina Fund er allt eða ekkert-söfnun verð ég að ná ákveðnu lágmarki til að söfnunin takist. Þetta þýðir að eingöngu er hægt að nota kreditkort til að styrkja – náð verður í heimild þegar þú styrkir en ekki tekið út af kortinu nema söfnun takist,“ bætir hún við.