Morgunblaðið hjólar í fréttamanninn Helga Seljan og tónlistarmanninn Bubba Morthens Staksteinum blaðsins í dag. Tilefnið er vörn blaðsins fyrir útvegsfyrirtækið Samherja sem á undir högg að sækja þessa dagana.
Morgunblaðið gerir blogg Páls Vilhjálmssonar framhaldsskólakennara að sínu og birtir í heild sinni í Staksteinum. Páll er helst þekktur fyrir að afneita loftslagsbreytingum og gera lítið úr nauðgunum kvenna. Í Morgunblaðinu segir:
„Helgi taldi sig mega flétta saman gildisdómum og fréttum. Þegar hallaði á Helga í héraði tók hagsmunahópurinn RÚV málið upp á alþingi götunnar. Bubbi Morthens fékk rauðan dregil fyrir fésbókarfærslu. Með íhygli fræðimannsins komst poppsöngvarinn að þeirri niðurstöðu að Helgi færi með „nakinn sannleika“. Samherjaböggið varð heilagur sannleikur í meðförum Bubba.“
Morgunblaðið heldur áfram að vitna í Páll, eða PV, eins og hann er kallaður í Staksteinum. „Næst sagði PV frá virkjun pírata í þágu glataðs málstaðar: „„Fordæmalaust túlkunarstríð“ heitir það á píratísku og þykir vont að hráar fjölmiðlalygar fái ekki viðtöku sem sannindi.“ Niðurstaða „RÚV“ og Bubba bloggara var: „Það sem slær mann sérstaklega er þögn þingmanna.“ Hvaða þingmenn munu nema skilaboðin og gleypa fluguna? „Fjölmiðill sem skilur ekki muninn á áróðri og frétt er siðferðilega og faglega gjaldþrota,“ segir PV réttilega.“
Síðasti hluti Staksteina virðist koma frá Davíð Oddsyni, ritstjóra blaðsins, enda fáir aðrir sem hafa ávallt gæsalappir utan um RÚV. Davíð rifjar upp þegar Páll Magnússon, þáverandi útvarpsstjóri en núverandi þingmaður Sjálfstæðisflokksins, og Helgi Seljan rifust á göngum í Efstaleitinu.
„Forðum tíð hjólaði Helgi Seljan opinberlega og með þjósti í þáverandi útvarpsstjóra, sem var á förum úr sínum stól. „RÚV“-Helgi krafðist svara frá útvarpsstjóranum um innri mál RÚV. Páll M. brást snöfurmannlega við, enda átti Helgi lítið inni, en hann gerði þó enn hróp að Páli. Viðbrögðin gleymast seint: „Þú ættir að skammast þín, þú ert óþverri,“ og virtist bæta við að Helgi væri skíthæll. Helgi sagði viðbrögð Páls barnaleg. Páll: „Það er skárra að vera barn en skíthæll.“