Einstöku myndskeiði af Fagradalsfjalli í Geldingadal, sem sýnir svæðið áður en byrjaði að gjósa og hvernig það lítur út núna, hefur verið deilt á YouTube.
Fyrri partur myndskeiðsins sýnir Fagradalsfjall þann 1. mars síðastliðinn, þremur vikum áður en eldgos í fjallinu hófst. Síðari hlutinn var tekinn upp 25. apríl og sýnir gosið og þá breytingu sem orðið hefur á landsvæðinu í kring.
Það er Snorri Þór Tryggvason, ljósmyndari og kvikmyndagerðarmaður með meiru, sem á heiðurinn af myndskeiðinu.
Segir Snorri í samtali við Mannlíf þessar ljósmyndir líklegast vera þær mikilvægustu, í sögulegu samhengi, sem hann mun nokkurn tímann fá tækifæri til að taka.
Fyrirtæki Snorra Þórs, Iceland 360° VR, sérhæfir sig í hágæða 360° panórama ljósmyndum af Íslandi. Hægt er að fara í einstakar sýndarveruleikaferðir um landið inni á vef þeirra, ásamt því að sjá fleiri magnaðar myndir af eldgosinu í Geldingadölum.
Myndskeiðið af Fagradalsfjalli, fyrir og eftir, má sjá hér að neðan.