Verðkönnun Mannlífs skoðaði mun á verði, hjá Nettó fyrir rétt rúmum þrem mánuðum og í dag. Borin voru saman verð út könnun Mannlífs er birtist 29. mars síðastliðinn og verð í vefverslun Nettó nú.
Niðurstöður
Skoðaðar voru 20 vörutegundir, 14 þeirra hafa hækkað í verði hjá Nettó. Tvær vörur lækkuðu í verði og fjórar stóðu í stað.
13 vörutegundir hækkuðu um 0,4 til 10 prósent.
Stellu rúgbrauð hækkaði um tæplega 31 prósent.
Tvær vörur lækkuðu í verði Bertolli viðbit lækkaði um 4,1 prósent og Hatting pítubrauð um tæplega 18 prósent.
Undarlegar breytingar á verðum
Það sem vekur athygli fyrir utan það að verð hafa hækkað talsvert á þessum stutta tíma, er það að þegar rýnt er í verðkönnun Mannlífs sem birtist þann 29. mars hafa orðið augljósar hrókeringar á verðlagningu hjá Nettó. Í fyrri könnuninni var Nettó með Hatting pítubrauðin 28,4 prósent dýrari en Heimkaup. Nú má sjá að einnig hafa orðið breytingar á verði Stellu rúgbrauðs sem mest hefur hækkað í þessarri könnun eða tæp 31 prósent en í eldri könnuninni var Heimkaup með rúgbrauðið 22,3 prósent dýrara en Nettó.
Leikur að verðum
Nettó hefur augljóslega hækkað verð á Stellu rúgbrauði frá því könnunin 29. mars var gerð og lækkað þar sem þeir komu illa út, Hatting pítubrauð. Þetta sýnir svart á hvítu að verslunin leikur sér með verðin og í leiðinni með neytendur. Þetta er langt því frá einsdæmi og sýnir hvað það er gríðarlega mikilvægt að einhver sé virkur í að fylgjast með og láta neytendur vita. Einnig, eins og alltaf hvetur Mannlíf neytendur til þess að vera glaðvakandi og gæta hagsmuna sinna.
Engin svör
Mannlíf hefur ítrekað sent póst á Samkaup til þess að meðal annars að spyrja um verðlagið hjá versluninni og þá hvort það sé forsvaranlegt að skilgreina Nettó sem lágvöruverðsverslun. Rekstrarstjóri Nettó, Hallur Geir Heiðarsson svarar engum spurningum frá Mannlíf og verður það að teljast í meira lagi skrítið.
Hér að neðan má sjá töflu með öllum upplýsingum:
Mannlíf er með puttann á púlsinum og framkvæmir verðkannanir tvisvar í viku og birtast þær á mánudögum og föstudögum öllu jafnan klukkan: 8:00. Hefur þú ábendingu um hvar Mannlíf ætti að framkvæma verðkönnun ? Sendu þá póst á [email protected].