Neytendur standa nú frammi fyrir því að Neytendastofa verði lögð niður í sparnaðar og hagræðingarskyni. Stofnunin hefur starfað í hartnær 16 ár og mikil sérfræðiþekking hefur skapast á þeim tíma.
Lítil umfjöllun
Lítið hefur verið fjallað um málið svo Mannlíf ákvað að vekja athygli á því, vegna þess að þetta er afar neikvætt og hrein afturför í neytendamálum. Það getur verið gott að sameina, ef það hentar og er raunverulega til hagsbóta. Svo er þó alls ekki alltaf raunin og lítur út sem einungis sé verið að hugsa um að ríkissjóður sé að spara en neytendur að tapa.
Neytendastofa lögð niður
Atvinnuvega- og nýsköpunarráðuneytið lagði fram drög að frumvarpi til laga þann 28. október 2020 sem fela í sér að Neytendastofa verði lögð niður. Málið er enn í vinnslu en verði frumvarpið samþykkt, munu stjórnsýsluverkefni á sviði vöruöryggismála, opinberrar markaðsgæslu og mælifræði færast yfir til Húsnæðis- og mannvirkjastofnunar en stjórnsýsluverkefni á sviði rafrænnar auðkenningar og traustþjónustu fara yfir til Póst- og fjarskiptastofnunar.
Sérfræðiþekking vanmetin
Neytendastofa hefur starfað síðan 2005 og á þeim tíma hefur ötult starf verið unnið og mikil sérfræðiþekking skapast. Það er eitthvað sem ekki færist yfir á aðra stjórnsýlu verði Neytendastofa lögð niður.
Þetta er gert til þess að hagræða í sparnaðarskyni fyrir ríkissjóð. Það þarf ekki að skoða drögin lengi til þess að sjá að það er margt bogið við tillögurnar að lagabreytingunum. Illa er rökstutt í sumum tilfellum og engan veginn fullnægjandi rök fyrir því að málum sé betur skipað á þennan hátt, nema auðvitað það sem augljóst er, sparnaðurinn.
Ekki hagur neytenda
Neytendasamtökin, Hagsmunasamtök heimilanna, Heilbrigðiseftirlit Reykjavíkur og Neytendastofa hafa sent inn umsagnir sem fela allar í sér gagnrýni á drögin. Heilbrigðiseftirlit Reykjavíkur vekur athygli á því að nú þegar sinni sú stjórnsýsla svipuðum verkefnum. Gagnrýnin felur í sér furðu yfir því hvers vegna þau verkefni yrðu þá ekki færð til þeirra. Neytendasamtökin, Hagsmunasamtök heimilana og Neytendastofa benda meðal annars á að ekki sé ráðlegt að framkvæma þessar breytingar, þær séu alls ekki neytendum í hag og að fremur þyrfti að styrkja starfsemina í núverandi mynd.
Mannlíf hvetur alla neytendur til þess að kynna sér málið. Hægt er að lesa um málið inn á Samráðsgátt hér og inn á vef Alþingis hér