- Auglýsing -
Tíu manna sveit frá björgunarsveitinni Þorbirni frá Grindavík stikaði í gærkvöldi gönguleið að gosstöðvunum við Fagradalsfjall. Verkið var unnið í brjáluðu veðri, allt gert til að auðvelda áhugasömum gönguna að gosinu og koma í veg fyrir að björgunarsveitin þurfi að hjálpa örmagna göngufólki eins og verið hefur.
Hin stikaða leið er um 3.5 kílómeter eða 7 km fram og tilbaka samkvæmt upplýsingum frá björgunarsveitinni. Lagt er af stað frá Suðurstrandavegi en lokun þeirrar leiðar í upphafi hefur verið harðlega gagnrýnd. Leiðin liggur að Nátthagakrika og er hækkun hennar um 300 metrar. Sveitin áætlar að það taki fólk um einn og hálfan tíma að ganga þessa nýstikuðu og öruggu leið.
Gríðarmikil ásókn hefur verið í eldosið í Geldingadal um helgina. Gosið er mjög úr alfaraleið og erfiðar aðstæður hafa verið í nágrenni þess; vont veður og merkingar engar.