Kópavogsbær braut með margvíslegum hætti á persónuverndarlöggjöfinni með notkun á Seesaw-nemendakerfinu; er þetta niðurstaða Persónuverndar sem hefur sektað sveitarfélagið um fjórar milljónir króna.
Persónuvernd horfði til þess að brot sveitarfélagsins hefðu beinst að persónuvernd barna sem njóti sérstakrar verndar samkvæmt persónuverndarlöggjöfinni.
Persónuvernd leit einnig til þess að Kópavogsbær hefði haldið áfram að nota Seesaw-nemendakerfið þrátt fyrir úrskurð í máli Reykjavíkurborgar. Þar komst Persónuvernd að þeirri niðurstöðu að kerfið stæðist ekki persónuverndarlöggjöfina. Borgin var sektuð um fimm milljónir króna og henni gert að eyða út öllum persónuupplýsingum.
Persónuvernd tekur fram að ekkert tjón virðist hafa orðið vegna brotanna og segir allt benda til þess að almennt upplýsingaöryggi Seesaw sé fullnægjandi. Þá segir stofnunin að Kópavogsbær hafi svarað öllum erindum með skýrum og greinargóðum hætti.