Hjónin Svavar Pétur Eysteinsson, betur þekktur sem tónlistarmaðurinn Prins Póló, og Berglind Häsler, viðburða- og samskiptastjóri VG, eru búin að selja Karlsstaði í Berufirði.Þau festu kaup á jörðinni árið 2014 og hafa rekið þar menningarmiðstöðina Havarí; gistiheimili; veitingastað og hófu þar framleiðslu á Boppi og Bulsum.
Um er að ræða 135 hektara jörð en þar af eru 25 hektarar ræktuð tún og matjurtagarðar. á jörðinni væru tvö íbúðarhús en annað þeirra er notað sem gistihús. Einnig er að finna matvælaframleiðsluhús með kæligeymslu, hostel, veitingahús og samkomusal sem og skrifstofu sem breytt hefur verið í hljóðver. Þá eru einnig eldri útihús, hlaða, fjós og hænsnakofi.
Á Facebook-síðu Havarís kemur fram að nýir aðilar hafi tekið við rekstrinum:
„Við höfum nú gengið frá sölu á Karlsstöðum í Berufirði og nýtt fólk tekið við rekstrinum. Við fluttum austur fyrir rúmum 7 árum og þó svo að Karlsstaðir hafi verið paradís okkar fjölskyldunnar þá var Havaríið mun stærra en það. Allt frá byrjun voru stórfjölskylda okkar og vinir tilbúin að taka þátt í þessu með okkur og stundirnar sem við áttum þarna saman ævintýralega magnaðar.
Handtökin voru nokkur en eitt skref í einu þá gekk þetta upp. Það var mikið hlegið en líka grátið enda ekki átakalaust að reisa þennan fagra bæ upp úr öskustónni. Við eigum eftir að sakna sveitarinnar og alls góða fólksins fyrir austan sem tók okkur opnum örmum. Við göngum sátt og hamingjusöm frá borði. Þökkum öllum sem sóttu okkur heim og óskum nýjum bændum á Karlsstöðum alls hins besta í framtíðinni. Havarí mun áfram standa fyrir taumlausa gleði og listgjörninga í raunheimi og netgeimi.“