Ragnar Freyr Ingvarsson, sérfræðingur í lyf- og gigtarlækningum og umsjónarlæknir COVID göngudeildar Landspítalans, segist þurfa setja sig í sérstakar stellingar til að geta svarað 31 ástæðu fyrir því að láta ekki bólusetja sig, sem Guðrún Bergmann birtir á vefsíðu sinni.
„Það er varla þess virði að svara þessu þetta er svo vitlaust, svo fullt af rangfærslum. Strax fyrsta ástæðan sem gefin er upp er að þetta sé ekki bóluefni heldur lyfjameðferð, það er bara rangt – auðvitað eru þetta bóluefni,“ segir Ragnar í samtali við Mannlíf.
Segist Ragnar jafnframt vera ósáttur og svekktur að Guðrún sé að láta frá sér slík ósannindi. Hann vill undirstrika að það sé mun öruggara að fá mótefnið heldur en að veikjast með COVID-19. Það sé öllum sem starfa í heilbrigðiskerfinu morgunljóst.
„Ég beini því til Guðrúnar Bergmann, frá einni manneskju til annarrar, að taka þetta niður, ekki vera að dreifa svona falsfréttum, rangupplýsingum og hreinum lygum,“ segir Ragnar að lokum.