Allir reikningar frá ríkissjóði og ríkisstofnunum verða sendir rafrænt til viðskiptavina frá og með 1. maí, eins og segir í tilkynningu á vef Stjórnarráðsins. Markmiðið er að lækka viðskiptakostnað allra aðila, nútímavæða viðskiptaumhverfi ríkisins með auknu framboði stafrænnar þjónustu og framfylgja umhverfissjónarmiðum.
Fjársýslan og ríkisstofnanir sjá um að senda reikningana út til viðskiptavina. Frá 1. Maí verða þeir aðgengilegir í gegnum pósthólfið á Island.is. Jafnframt verður í boði að fá reikninga senda rafrænt í gegnum skeytaþjónustu. Reikningar eða greiðsluseðlar sem verða rafrænir varða til dæmis þing- og sveitarsjóðsgjöld, bifreiðagjöld, þungaskatt, sektir, komugjöld og fleira.
Um 200 milljónir sparast árlega
Áætlað er að um 200 milljónir króna sparist á ári með því að nýta rafræna reikninga, meðal annars með lækkun prentkostnaðar og póstburðargjalda.
Unnið hefur verið að því að gera viðskiptaumhverfi ríkisins rafrænt í samræmi við stefnu þar um. 1. janúar 2020 tók gildi ákvörðun fjármála- og efnahagsráðuneytisins um að allir reikningar vegna kaupa ríkisins á vöru og þjónustu skyldu gefnir út með rafrænum hætti.