Sævar Freyr Þráinsson, forstjóri Orkuveitunnar, segist ekki útiloka neitt þegar kemur að fjárfestum í Ljósleiðarann; en eigendur Orkuveitunnar hafa samþykkt að selja þriðjungs hlut í Ljósleiðaranum.
Kemur fram á RÚV að borgarstjórn samþykkti að veita stjórn Ljósleiðarans heimild til að sækja meira hlutafé til einkaaðila, en Orkuveitan er sameignarfyrirtæki Reykjavíkurborgar, Akraneskaupstaðar og Borgarbyggðar.
Allir eigendurnir hafa samþykkt, fyrir sitt leyti, að selja þriðjung í fyrirtækinu, en upphaflega var rætt um að hluturinn myndi mögulega leggja sig á ellefu milljarða; líklegt er talið að sú tala sé hærri.
Sævar segir mikinn áhuga hjá fjárfestum á félaginu og segist hann þó hafa trú á að verðmætið sé umtalsvert meira; verðmat eigi eftir að koma á félagið; það eigi eftir að myndast á markaði.
„Nú erum við að hanna ferlið. Við ætlum að vanda okkur. Við erum búin að ráða Arion banka til verksins. Og við munum á næstu vikum kynna nákvæmlega hvernig verður staðið að þessu ferli,“ segir Sævar.