2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Safna fyrir barnabók um veganisma

Söfnun er hafin á Karolina Fund til að fjármagna þýðingu á bókinni That’s Why We Don’t Eat Animals eftir Ruby Roth sem kom út árið 2009. Að söfnuninni standa Benjamín, Sigurjón og Jenný Sigurgeirsbörn og þurfa þau 4500 evrur, eða rúmlega 550 þúsund krónur til að ná takmarki sínu á síðunni.

Á síðu söfnunarinnar stendur að bókin henti börnum á aldrinum sex til tíu ára og að þetta sé fyrsta barnabókin sem fjalli um dýr og veganisma.

„Í bókinni sýnir Ruby dýrin í eðlislægum aðstæðum náttúrunnar þar sem þau leika sér og verja tíma með fjölskyldum sínum. Bókin sýnir líka dýrin í grimmilegum aðstæðum verksmiðjubúskapar. Á einfaldan hátt, svo ekki er um villst, er lesendum gert ljóst hvort er betra fyrir dýrin,“ skrifa þeir sem standa að söfnuninni og bæta við að tími sé til kominn að Ísland eignist sína þýðingu af bókinni.

„Það er orðið tímabært að fá bók sem þessa í íslenskri þýðingu sem lýsir hvað dýr í búskap þurfa að þola á eins heiðarlegan hátt og mögulegt er í bók sem höfðar til barna. Í gegnum reynslu sína af bókinni, og starfi sínu með börnum, segir höfundurinn að börn geti vel tekið til sín upplýsingarnar sem eru settar þar fram og myndað sér skoðun um hvað sé rétt og rangt í meðferð okkar á dýrum.“

Söfnuninni lýkur þann 16. júní en þeir sem heita á verkefnið geta tryggt sér eintak af bókinni.

Ekki missa af þessum

Annað áhugavert efni

Nýjast á Mannlíf.is