Stysta leiðin að gosstöðvunum við Litla-Hrút er frá Oddafelli við Höskuldarvelli, eins og Mannlíf greindi frá í fyrradag. Vandinn er sá að vegurinn að Keili er harðlokaður, að ákvörðun lögreglunnar á Suðurnesjum. Þar með neyðist fólk til að ganga frá Slögu með gosreykinn í fangið, alls 20 kílómetra leið í stað þess að ganga alls 10 kílómetra og anda að sér hreinu lofti á leggnum meðfram Keili. Ef gengið er vestur eftir Oddafelli og meðfram Driffelli er leiðin að gosinu hættulítil. Þúsundir hafa lagt leið sína að gosinu þá 20 kílómetra leið sem um ræðir frá Slögu og nokkrir hafa örmagnast og þónokkrum hefur verið snúið frá.
Óljóst er með heimildir lögreglunnar til að loka Keilisvegi sem er í einkaeigu eigenda Stóru-Vatnsleysu, Litlu-Vatnsleysu og stórfyrirtækisins Samherja sem á stóran hluta Höskuldarvalla í sameign. Ekki er vitað til þess að eigendurnir hafi bannað umferð um veginn eða haft nein afskipti af umferð um hann.
Gönguleiðinni um Meradali að gosstöðvunum hefur verið lokað fram á laugardagsmorgun. Ástæða lokunarinnar er að sögn lögreglu á Suðurnesjum til þess að tryggja öryggi ferðamanna og viðbragðsaðila. Mikil mengun er á svæðinu.
Athugasemdir