Seinheppinn þjófur í Reykjanesbæ valdi sannarlega rangt heimili til að brjótast inn í um miðja þessa viku. Þjófurinn gerði tilraun til að brjótast inn að næturlagi en valdi sér heimili þar sem húsráðandi er vel þjálfaður lögreglumaður.
Rætt er um málið í hópi íbúa Reykjanesbæjar á Facebook þar sem húseigandi fjallar um atvikið:
„Kæru íbúar! Um tvöleytið í nótt var gerð tilraun til innbrots hjá okkur, tekið í hurðarhúna og reynt að komast inn. Hundarnir á heimilinu vöktu okkur og sjáum við aðilann vera að reyna að opna hurð í hjá nágranna. Við náðum í skottið á honum og er um góðkunningja lögreglunnar að ræða. Hringdum á vakthafandi lögreglu sem kom skömmu síðar. Fariði varlega, læsið öllum dyrum og fylgist vel með.“
Heimildir Mannlífs herma að lögreglumaðurinn þjálfaði hafi brugðið skjótt við og hlaupið þjófinn uppi og snúið hann niður. Lögreglan mætti svo á staðinn og tók við keflinu og skráði atvikið.
Talsvert hefur verið um slíkar mannaferðir að nóttu í Reykjanesbæ undanfarið. Eru íbúar hvattir til að vera á varðbergi.