Dagur B. Eggertsson keypti aldrei bílastæði af Reykjavíkurborg. Þá hefur hann ekki átt þrjú bílastæði við Óðinstorg og heimili sitt. Vigdís Hauksdóttir, borgarfulltrúi Miðflokksins hefur sakað Dag um að sölsa undir sig þrjú bílastæði í krafti borgarstjóratitils. Einnig hefur því verið haldið fram að kostnaður við Óðinstorg hafi verið 657 milljónir króna. Hið rétta er að kostnaður er um 60 milljónir. Því hefur verið haldið fram að orsakatengsl séu á milli myndbandsins og skotárásar á bíl borgarstjóra.
Tómas Guðbjarnarson, stundum lækna-Tómas, sendi Vigdísi og samtökunum, Björgum miðbænum, pillu á Facebook-síðu sinni nú undir kvöld og segir að um sé að ræða eitt mesta heimaskítsmát í íslenskri borgarstjórnarpólitík. Vill Tómas að Dagur verði beðinn afsökunar á rangfærslunum. Tómas segir:
„Ég á varla von á því að þessir aðilar biðjist afsökunar á þessu skítkasti og klúðri, enda ekki staðalbúnaður hjá þeim að halda sig við sannleikann og sanngirni.“
Fjörugar umræður og hatrammar að hluta eiga sér stað undir pistli Tómasar.
Sigurður Þ. Ragnarsson, veðurfræðingur og Miðflokksmaður sem oftast gengur undir nafninu Siggi stormur tekur upp hanskann fyrir Vigdísi og blæs á gagnrýni læknisins.
„En hvers vegna ert þú svona orðljótur? En sannleikann á að segja og hafa það sem sannara reynist,“ segir Siggi stormur og segir að Tómas hefði betur talið uppá tíu áður en hann tjáði sig. Undirtektir um að Tómas hafi farið yfir strikið eru nánast engar. Jakob Bjarnar Grétarsson, blaðamaður á Vísi, sagði Sigga storm á villigötum og varla flokkaðist heimaskítsmát sem dónaskapur. Við því átti Siggi stormur ekkert svar.
Þá tekur Teitur Atlason, fjölmiðlamaður, til máls í þræðinum og segir:
„Hann var sakaður um að kaupa þrjú bílastæði af borginni en hið rétta er að hann keypti 2 bílastæði af nágrönnum sínum.“
Sigurður Þ. Ragnarsson svarar Teiti með nokkru þjósti: „Mér er raunar slétt sama af hverjum borgarstjóri keypti þessi stæði, en hjólandi borgarstjóri með væntingar um fjórfalda aukningu á notkun almenningssamgangna, hvers vegna þarf hann þrjú bílastæði?“
Vilhjálmur Þorsteinsson fjárfestir bendir Sigga storm á að stæðin sem Dagur keypti af nágrönnum, ekki borginni, séu tvö en ekki þrjú. Teiti blöskraði svar Miðflokksmannsins, Sigga Storms og spyr hvort honum sé virkilega slétt sama?
„Því er haldið fram í þessu myndbandi að borgarstjóri hafi keypt þrjú bílastæði af borginni. Hið rétta er að hann keypti tvö bílastæði af nágrönnum sínum. Og þér er „slétt sama“ við þessa leiðréttingu? . . Og bætir við að hann sé:
„Hjólandi borgarstjóri“.
Teitur bendir á að hleypt hafi verið af skoti sem hæfði bíl borgarstjóra. Þá sé bent á möguleg tengsl milli lygamynbands Vigdísar Hauksdóttur og samtakanna og skotárásanna.
„Lygar í myndbandinu eru hraktar og þér er „slétt sama“? segir Teitur og bætir við:
„Hvert erum við eiginlega komin þegar rök skipta engu máli? Er yfirleitt hægt að tala við fólk sem er hugsturlað af hatri til Dags?“