Siglfirðingar eru sagðir verulega uggandi. Maður, líklega innbrotsþjófur, hefur hrellt íbúa undanfarna daga. Afbrotahrina mannsins hófst fyrir þremur dögum en síðan þá er talið að hann hafi farið inn í fjögur hús. Ríkisútvarpiðð sagði frá. Það er ef til vill óhugnanlegra að hann tók einungis verðmæti úr einu húsanna.
Í tveimur tilvikum komu íbúar að manninum og náðu að hrekja hann á brott. Ekki hefur þó tekist að handsama manninn. Maðurinn munn ekki hafa brotið sér leið inn í húsin.
RÚV ræddi við Bylgju Hafþórsdóttur, íbúa á svæðinu, sem segist hafa lent í manninum í nótt: „Ég hrökk upp klukkan hálf fjögur við að einhver væri að reyna að komast inn í Benz jeppann hjá Halldóri og Hönnu. Bílunum var lagt fyrir utan svefnherbergisgluggann hjá mér, ég er í kjallaraíbúð og glugginn var opinn,“ segir Bylgja og heldur áfram:
„Þegar hann var búinn að reyna við bílinn þeirra þá fór hann í minn og var ekki einu sinni að reyna að fara hljóðlega. En þar sem ég er í kjallaraíbúð þá náði ég ekki að sjá neitt í gegnum gluggana og þegar ég kom inn í stofu og var að kíkja í gegnum gluggana þar þá sá ég engan.“