Fjölmiðlakonan Snæfríður Ingadóttir tók sig til um síðustu helgi og tíndi rusl á Tenerife með fjölskyldu sinni. Hún segir um að gera að gera gagn á meðan hún dvelur þar.
Snæfríður greinir frá þessu í færslu á Facebook-síðu sem hún heldur utan um, Tenerife ævintýraeyjan. Þar segir hún:
„Um síðustu helgi tókum við fjölskyldan þátt í hreinsunardegi. Þetta eru sjálfboðaliðasamtök sem standa reglulega fyrir svona hreinsunardögum á strandsvæðum á suðurhluta eyjunnar. Þennan dag söfnuðust 100 kg af rusli á tveimur klukkutímum á Abades ströndinni. Mikið af þessu rusli voru sígarettustubbar sem safnað er sérstaklega því stubbarnir eru sendir til Frakklands þar sem þeir eru endurnýttir í vörubretti,“ segir Snæfríður og heldur áfram:
„Þeir sem vilja láta gott af sér leiða á meðan þeir dvelja hér á Tenerife geta fylgst með á Facebooksíðu samtakanna. Það mætti alls konar fólk á þennan viðburð, bæði börn og fullorðnir og lögðu hönd á plóg. Samtökin voru með hanska, poka og griptangir svo það var bara að mæta og gera gagn. Mæli með.“