Það þykir vera klókt af fulltrúum á þingi Alþýðusambands Íslands að fresta þinginu fram á vor í stað þess að kjósa stjórn framhjá Eflingu og VR. Eftir útgöngu Ragnars Þórs Ingólfssonar, Sólveigar Önnu Jónsdóttur og Vilhjálms Birgissonar virtist sem þau væru með pálmann í höndunum og sambandið klofið í herðar niður. Höfuðpaur uppreisnarinnar í ASÍ er Sólveig Anna sem lýsti því að helstu óvini hennar væri að finna innan Starfsgreinasambandisins, þeirra á meðal „hina og þessa sjómanna-foringja og leiðtoga innan úr SGS,“ eins og hún orðaði það. Þarna þykir vera stutt í fordómana.
Nú er staðan sú að ASÍ lifir með menningarbyltinguna innanborðs. Á næstunni mun reyna á það hvort Sólveig Anna og Ragnar standa við stóru orðin og sækja ríflegar kjarabætur fyrir félagsmenn sína. Ef þeim mistekst að sækja boðaðar kjarabætur mun fjara hratt undan þeim og ASÍ réttir úr kútnum. Innan VR er veruleg andstaða við framgöngu formannsins og félagið klofið að einhverju marki á meðan stríðsstemmning ríkir innan Eflingar. Óhætt er að segja að Sólveig Anna sitji uppi með Svarta Pétur eins og staðan er núna …