Söngdívan Heiða Ólafsdóttir og Helgi Páll Helgason gengu í það heilaga í kvöld. Brúðurin var stórglæsileg á að líta, enda falleg kona þar á ferð.
Heiða kom fyrst fram á sjónarsviðið í Idol Stjörnuleit og hefur hún aldeilis unnið hug og hjörtu Íslendinga enda ekki bara góð söngkona heldur hefur hún frábæran persónuleika. Heiða er strandamaður í húð og hár, hún er fædd og uppalin á Hólmavík.
Afmæli og brúðkaup
Turtildúfurnar gengu í það heilaga á afmælisdegi Helga Páls og lét Heiða falleg orð falla í garð eiginmannsins á Facebook síðu sinni af því tilefni: „Það eru svo ótalmargar ástæður fyrir því að ég elska þennan dásamlega mann minn og ég er alltaf jafn þakklát fyrir að við fundum hvort annað. Ég er sjúklega skotin í honum, svo ég tali nú aðeins um yfirborðskennda hluti en hann er allt sem heillar mig, með ótrúlega fallegt andlit, ljós yfirlitum, hávaxinn, axlabreiður og stór og sterkur. En síðan bætast allir hinir hlutirnir við sem eru ekki svona yfirborðskenndir og þegar ég hugsa um alla hans kosti þá stækkar hjarta mitt margfalt. Hann er svo ljúfur og yfirvegaður, algjör herramaður, svo ofboðslega góður við mig og hugsar alltaf um mig eins og prinsessu. Við eigum svo vel saman, hlægjum eins og vitleysingar, elskum að upplifa og njóta og svona gæti ég lengi talið. Við eigum svo falleg líf saman og ég get ekki beðið eftir öllum árunum okkar þangað til við verðum eldgömul og grá. Í dag tökum við síðan lokaskrefið í að sameinast því í dag giftumst við. Ég hlakka til að vera góð við þig alla daga elsku fallegi unnusti og verðandi eiginmaður. Elska þig af öllu hjarta“.
Mannlíf óskar brúðhjónunum innilega til hamingju með daginn og með hvort annað.