Icelandair flugfélagið fær bættan stærstan hluta þess tjóns sem fyrirtækið varð fyrir vegna kyrrsetningar Boeing 737 MAX flugvélanna. Samkomulag við flugvélaframleiðandann hefur náðst. Þá hafa stjórnendur Icelandair einnig náð samkomulagi við alla kröfuhafa félagsins og viðræður við íslenska ríkið um ríkisábyrgð á lánum eru langt komnar.
Þetta kemur fram í tilkynningu frá félaginu en þar segir að Icelandair losni undan kaupum á fjórum MAX-vélum og afhendingaáætlun á öðrum sex vélum hefur verið breytt. Félagið segir bótafjárhæðina frá Boeing vera trúnaðarmál.
Bogi Nils Bogason, forstjóri Icelandair Group, fagnar áfanganum og segir þrekvirki hafa verið unnið. Þá hafi það einnig verið gífurlega mikilvægt að loka langtímasamningum við allar flugstéttir félagsins.
„Mikil vinna hefur átt sér stað á liðnum mánuðum við að endurskipuleggja rekstur Icelandair Group og búa félagið undir sókn á nýjan leik. Þar hafa starfsmenn félagsins unnið mikið þrekvirki. Allt eru þetta mikilvægir þættir í fjárhagslegri endurskipulagningu félagsins sem nú er á lokastigi,“ segir Bogi.