Bíó Paradís fagnar nýju nafni á splunkunýjan fjölskyldumeðlim en það er nýja poppvélin Maísól Camilludóttir. Haldin var nafnasamkeppni til þess að finna nafn á gripinn og tóku hátt í 600 manns þátt. Sigríður Dagbjartsdóttir bar sigur úr bítum með nafnið Maísól.
Hér má lesa tilkynningu Bíó Paradís í heild sinni :
„Bíó Paradís kynnir með stolti nýjasta fjölskyldumeðliminn á Hverfisgötunni, MAÍSÓL CAMILLUDÓTTUR!!! Langþráður draumur aðstandenda Bíó Paradísar um að eignast nýja poppvél rættist á dögunum. En til að nefna gripinn var brugðið til þess ráðs að leita til almennings eftir nafni. Hátt í 600 tillögur bárust á facebook og eftir þó nokkra yfirlegu, varð nafnið Maísól fyrir valinu. Nafnið þótti bjart og minna á rísandi sól, bæði yfir landinu og kvikmyndaheiminum öllum eftir dimma tíma drepsóttar og almennra leiðinda. Nú horfir til bjartari tíðar sem betur fer, og mun Maísól sjá til þess að gestir Bíó Paradísar fái ætíð brakandi ferskt og bragðgott popp þegar þeir koma í bíó. Það var Sigríður Dagbjartsdóttir sem kom með nafnið á gripinn. Fékk hún að launum gjafabréf í Bíó Paradís fyrir tvo ásamt poppi og bjór eða vínglasi. Aðspurð að tilurð nafngiftarinnar sagði hún að henni hefði dottið þetta strax í hug þegar hún hugsaði um poppmaís. “Þetta var bókstaflega það fyrsta sem ég hugsaði” sagði Sigríður þegar hún kom að sækja vinninginn í Bíó Paradís. Hún sést hér á mynd ásamt Viðari Snæ Garðarssyni vaktstjóra í Bíó Paradís. Við viljum þakka frábærar tillögur að nöfnum fyrir poppvélina, og hvetjum alla til að koma sem fyrst í paradís til að sjá Maísól í aksjón. Maísól er kennd eftir fyrirrennara sínum, Camillu, sem þjónaði bíóinu frá árinu 1998. Við búumst við því að arftaki hennar Maísól verði með okkur ekki skemur en hún“.
Mannlíf óskar Bíó Paradís til hamingju með Maísól og Sigríði til hamingju með sigurinn.