Árið 2018 er senn á enda. Um viðburðaríkt ár var að ræða í skemmtanabransanum. Nýjar stjörnur komu fram á sjónarsviðið eins og gengur og gerist og nokkrar féllu frá. Þetta eru nokkrar af þeim erlendu stjörnum sem létust á árinu.
Stan Lee. Teiknimyndahöfundurinn var 95 ára að aldri þegar hann lést í nóvember. Hann er einn af mönnunum á bak við ofurhetjurnar The Hulk og Spider Man. Hann lést í Los Angeles og dánarorsökin var lungnabólga.
Burt Reynolds. Leikarinn lést í september, 82 ára gamall. Hann var afar vinsæll á áttunda áratugnum og lék meðal annars í Smokey and the Bandit og Deliverance.
Mac Miller. Rapparinn lést í september á heimili sínu í Kaliforníu. Hann lést af völdum ofneyslu eiturlyfja og áfengis.
Aretha Franklin. Söngkonan var 76 ára þegar hún lést í Detroit í Bandaríkjunum í ágúst. Hún greindist með krabbamein árið 2010.
Anthony Bourdain. Kokkurinn og matargagnrýnandinn var 61 árs þegar hann lést í sumar.
Kate Spade. Hönnuðurinn lést á heimili sínu í New York í júní, þá 55 ára að aldri.
Dolores O‘Riordan. Írska söngkonan lést á hóteli í London í janúar á þessu ári. Hún var söngkona hljómsveitarinnar The Cranberries. Hún var 46 ára þegar hún lést. Hún er sögð hafa drukknað í baðkari vegna ölvunar.
Mark Salling. Glee-leikarinn fannst látinn í janúar skammt frá heimili sínu. Hann hafði hengt sig. Skömmu áður hafði hann verið dæmdur fyrir vörslu barnakláms.
Avicii. Sænski plötusnúðurinn var 28 ára þegar hann lést í apríl. Hann svipti sig lífi. Ferill Avicii hófts þegar hann var 16 ára gamall en hann náði heimsfrægð árið 2011 með laginu Levels.
Verne Troyer. Bandaríski leikarinn lést 49 ára að aldri í apríl. Hann var þekktastur fyrir hlutverk sitt sem Mini-Me í kvikmyndunum um Austin Powers.
John Mahoney. Leikarinn var 77 ára að aldri þegar hann lést í febrúar. Hann er þekktastur fyrir hlutverk sitt í þáttunum Frasier. Hann lést á sjúkrahúsi í Chicago.