Ljósmynd sem virðist sýna draug var nýverið birt í hópi á Facebook þar sem fólk skiptist á sönnum íslenskum draugasögum.
Myndin, sem sjá má neðst í fréttinni, var að sögn konunnar sem setti hana inn á hópinn, tekin af móður hennar fyrir ári. „Mamma mín tók þessa mynd út um glugga í tómu húsi í fyrra og var ein á staðnum, þannig ekkert sjónvarp, engin endurspeglun, myndin tekin á Samsung Galaxy S7 Edge síma. Hinsvegar er ég heldur betur búinn að hugsa hvernig er þetta hægt og einhver sem hefur svör?“
Færslan hefur hlotið gríðarlegar undirtektir en þegar þetta er ritað hafa 156 manns líkað við hana og hátt í 40 skrifað athugasemdir. Langflestir sjá greinilega andlit í vinstra horni myndarinnar en sumir sjá einnig fingur og jafnvel börn á myndinni.
Elva sá andlitið greinilega. „Ég sé hálft andlit af manni fremst á myndinni hárið augað eyrað smá af nefinu munninum hálsinn og smá af jakkanum hann lítur upp. Þetta er mjög skýrt og skrítið. Sá hann strax og ég leit á myndina …“
Hrefna sér meira á myndinni. „Og mjög augljóslega tvær hendur í hinu horninu.“
Ágústa sér enn meira á myndinni. „Váá … Ég sé líka fullt af öðru fólki þarna hægra megin. Mjög mögnuð mynd!“
Hafdís sér svo langmest. „Það eru þrír menn og tvö börn þarna á myndinni.“
Ekki eru allir sammála um að þarna sé komin sönnun á hinu yfirnáttúrulega og reyna að finna eðlilegri útskýringu. Sú sem setti myndina á Facebook svarar þeim öllum og segir ekkert geta úrskýrt þetta. „Við þekkjum ekki þennan mann, mamma mín endurspeglast ekki þarna, hún lagði símann alveg að rúðunni og tók myndina á annarri hæð í húsi úti í sveit og er í stofunni.“
Ljósmyndina dularfullu má sjá hér fyrir neðan.
Mynd: Aðsend