„Hef aldrei getað skilið hvers vegna fólki er boðið að borga miklu meira fyrir minna magn!“
Þetta segir Björn Birgisson og birtir upplýsingar sem mikilvægar eru fyrir neytendur. Björn er þekktur í Grindavík og víðar fyrir að liggja ekki á skoðunum sínum og óhræddur við að láta þær í ljós á samfélagsmiðlum . Hann greinir frá því að hann hafi fundið rauðkálskrukkur í Nettó. Hann furðar sig á því að stærri krukka af rauðkáli er mun ódýrari en sú minni. Þetta á við um fleiri vörur í versluninni.
Kílóverð á rauðkáli ef sú tærri er keypt er þá 566 krónur en yfir þúsund krónur ef viðskiptavinur leggur í vana sinn að taka þá minni. Þetta á einnig við um gulrætur og grænar baunir og sykur frá Dan sukker. Svipuð dæmi má finna í öðrum verslunum og því mikilvægt að neytendur átti sig á þessu.
„Þetta er alveg ótrúlegt og þetta er á flestu sem er til í fleiri enn einni stærð,“ segir Hildur nokkur Þorsteinsdóttir á þræði Björns á Facebook. Björn furðar sig á hvers vegna fólki er boðið uppá að borga mun meira fyrir minna magn.
„Veit ekki betur en að rauðkál geymist ágætlega í kæliskápnum og því ekki nokkur ástæða til að borga meira fyrir miklu minna magn,“ segir Björn og Neytendahornið beinir því til lesenda að vera vakandi fyrir þessu.