„Ámælisverðir viðskiptahættir fengu að viðgangast í starfsemi útgerðar Samherja
í Namibíu. Veikleikar voru í stjórnskipulagi og lausatök sem ekki áttu að líðast,“ segir Þorsteinn Már Baldvinsson, forstjóri Samherja, í heilsíðuauglýsingu Samherja í Morgunblaðinu í dag. Svo er að sjá sem forstjórinn sé að biðjast afsökunar á því að hafa ekki stöðvað starfsmenn sína, fremur en að hann hafi sjálfur staðið að eða hvatt til lögbrota.
„Við brugðumst ekki við eins og okkur bar. Þetta hefur valdið uppnámi hjá starfsfólki okkar, fjölskyldum, vinum, samstarfsaðilum, viðskiptavinum og víða í samfélaginu. Við hörmum þetta og biðjumst einlæglega afsökunar. Það geri ég persónulega sem forstjóri og einnig fyrir hönd félagsins sem ætíð hefur haft vönduð vinnubrögð að leiðarljósi í allri sinni starfsemi,“ segir Þorsteinn Már.
„Við viljum ekki láta við það sitja að biðjast afsökunar heldur draga lærdóm af
þessum mistökum og tryggja að ekkert slíkt gerist aftur. Í því skyni höfum við
gripið til viðamikilla ráðstafana,“ skrifar forstjórinn.
Í niðurlagi auglýsingarinnar kemur hann inn á mútumálið í Namibíu sem hann kallar mistök.
„Mistök okkar í Namibíu eru ekki síst okkur sjálfum mikil vonbrigði. Við munum ekki láta slíkt henda aftur,“ skrifar hann.
Ekki kemur fram í auglýsingunni hvort þeir starfsmenn sem stóðu að ofsóknum á hendur Helga Seljan fréttamanni eða grófu undan honum starfi áfram hjá félaginu.