Þorvaldur Gylfason hagfræðiprófessor segir það galið að ríkið ætli að selja hlut sinn í Íslandsbanka við þær kringumstæður sem uppi eru. Hann telur að gamlir bankaræningjar bíði handan við hornið.
Þetta kemur fram í færslu Þorvaldar á Facebook. „Hvers vegna sækist óheiðarlegt fólk eftir því að eignast banka? Það er m.a. vegna þess að bankar geta afskrifað skuldir óreiðumanna og afskriftirnar eru leynilegar í þokkabót. Við bætist geta banka til að gera upp á milli lántakenda í umhverfi þar sem vextir eru miklu lægri en áður,“ segir Þorvaldur og bætir við:
„Við þessar kringumstæður væri það óðs manns æði að selja nú hlut ríkisins í Íslandsbanka. Við bætist að gamlir bankaræningjar sem sýna engin merki þess að þeir kunni að skammast sín eiga ekki að fá að koma nálægt bankasölu — eða peningum yfirleitt.“