Stefán Karlsson verður jarðsunginn í dag og margir minnast hans með fallegum og hlýjum orðum í dag. Meðal annars þrír ungir synir hans sem nú hafa misst föður sinn alltof snemma. Stefán var aðeins 41 árs gamall er hann lést.
Stefán lést því langt fyrir aldur fram. Hann var framkvæmdastjóri Vals í tvö ár og stjórnarmaður í handknattleiksdeild félagsins. Stefáni er lýst sem afar vönduðum manni, góðhjörtuðum og ráðagóðum. Hann var einnig mikill leiðtogi og tók Stefán á móti öllum glaðbeittur á svip og bros hans leið fólki seint úr minni.
Ungir synir hans þrír, þeir Kristófer, Rúnar og Ingimar, minnast föður síns í Morgunblaðinu í dag. „Elsku pabbi, þú varst fyndinn, góður, duglegur og skemmtilegur. Við munum sakna hláturs þíns og hversu góður þú varst. Við munum sakna þess þegar þú söngst Dengsa-lögin hans Hemma. Þú varst alltaf til í að gera allt með okkur, hvort sem það var að leika hákarl í sundlauginni, spila FIFA eða hvað sem er. Við munum alltaf elska þig og hugsum fallega til þín,“ segja bræðurnir.
Stefán fæddist í Reykjavík 17. september 1979. Hann lést á heimili sínu 19. janúar síðastliðinn. Eftirlifandi eiginkona Stefáns er Sigurlaug Rúna Rúnarsdóttir.
Stefán útskrifaðist úr Verslunarskólanum og eftir það lá leið þeirra Sigurlaugar til Danmerkur þar sem hann útskrifaðist með diplóma í markaðsfræðum frá Niels Brock. Hann lauk síðan BS-gráðu í viðskiptafræði og MBAgráðu frá Háskólanum í Reykjavík.
Stefán hóf störf hjá Vinnufötum ehf. eftir að hann kom frá námi í Danmörku og vann þar með hléum stóran hluta ævi sinnar. Stefán vann í rúmlega 20 ár í kringum Knattspyrnufélagið Val í mörgum lykilhlutverkum. Hann var meðal annars formaður handknattleiksdeildar og á árunum 2008-2009 starfaði hann fyrst sem fjármálastjóri og svo sem framkvæmdastjóri félagsins.
Sigurlaug syrgir ástkæran eiginamanns síns í minningargrein. „Elsku Stebbi minn er látinn. Þetta er það sárasta sem ég hef lent í vegna þess að hann var svo einstakur. Ég veit ekki hver á núna að taka vel í allar klikkuðu hugmyndirnar sem ég fæ og allt sem mér dettur í hug. Hann var alltaf tilbúinn að gera næstum allt sem mér í datt í hug,“ segir Sigurlaug og heldur áfram:
„Ég mun geyma allar minningar okkar í hjarta mínu og minning hans lifir í gegnum okkur öll. Ég passa strákana okkar. Við ætlum ekki að reyna að skilja allt, en við fyrirgefum. Stebbi var ekki bara eiginmaður minn heldur líka minn besti vinur og sálufélagi. Ég er einstaklega þakklát fyrir þessi 23 ár sem við fengum saman. Ég þarf að læra að lifa með því að elsku Stebbi minn sé farinn. Ég get ekki orða bundist hversu mikið ég sakna hans og mig verkjar í hjartað að vita til þess að hann muni aldrei halda utan um mig aftur, hlæja að bröndurunum mínum eða elda fyrir mig lund og béarnaise. Stebbi var frábær pabbi, eiginmaður, félagi og vinur í blíðu og stríðu,“ segir Stefán.
Ágúst Jóhannsson minnist persluvinar síns og lýsir honum með hlýjum orðum. „Einn okkar allra besti maður er fallinn frá og það allt of snemma. Þvílíkt þakmenni, öðlingur, leikmaður og vinur. Það er erfitt að koma orðum að þessu öllu og því sem mig langar að segja um hann. Hann hafði svo hlýja og trausta nærveru; var skarpur, agaður og nálgaðist hlutina af yfirvegun. Stebbi Karls var ekki bara einstakur vinur heldur frábær pabbi og fjölskyldumaður. Elsku vinur! Þetta er eitt það erfiðasta sem ég hef þurft að skrifa og vildi ekki þurfa að gera það. En staðan er þessi og ég reyni að komast í gegnum þetta og lifa með þessu. Ég á frábærar minningar sem ég mun rifja reglulega upp og segja fólki sögur af þér, hve einstök og góð persóna þú varst. Ég vona að þér líði vel elsku vinur. Minningin um frábæran pabba og eiginmann mun lifa með ykkur og vonandi styrkja í sorginni. Elsku Stebbi Karls. Ég gleymi þér aldrei, elsku vinur,“ segir Ágúst.
Útförin fer fram frá Lindakirkju í dag klukkan 13. Athöfninni verður streymt hér.