Sigurður nokkur setti nýverið færslu á síðu íbúa Laugarneshverfis í Reykjavík. Þar lýsti hann samskiptum sínum við tvo unglingsstráka sem voru staddir fyrir utan Krambúðina í hverfinu. Voru þeir á hjóli en höfðu ekki hjálm á höfði. Það þótti Sigurði ekki nógu gott. „Ég kallaði á drengina og sagði þeim að það væri ekki sniðugt að vera hjálmlausir og bað þá að reiða hjólið heim eða ég mundi hringja á lögregluna.“
Drengirnir brugðust að sögn Sigurðar illa við orðum hans. „Einn drengjanna kallar þá á mig „Farðu í meðferð, rauðperri“ og reiddu þeir svo hjólin í burtu.“
Segir Sigurður að svona framkoma sé ekki í lagi og bæði drengirnir og foreldrar þeirra þurfi hjálp. Lýsir hann svo klæðnaði drengjanna.
Margir hafa svarað þessari færslu hans en sitt sýnist hverjum.
Sóley segir það nokkuð hart að skipa ókunnugu fólki, hvort sem um fullorðna eða börn sé að ræða, „að haga sér eftir okkar gildum.“ Segir hún að það sé miklu vænlegra að nálgast börn og unglinga með sömu virðingu og fólk vill að sér sé sýnd.
Heimir er heldur beinskeyttari í sinni athugasemd. „Það kemur þér ekkert við hvort aðrir hjóli með hjálm eða ekki. Að hóta lögreglunni útaf börnum á hjóli eru öfgakennd viðbrögð.“ Sigurður svarar og segir að það sé stórhættulegt að hjóla án hjálms. „Ef börnin detta geta þau fengið heilahristing eða dáið. Ekkert er öfgakennt þegar kemur að lífi barna.“ Bætir Sigurður svo við að drengirnir hafi verið dónalegir við sig. Rifrildi þeirra heldur áfram en óþarfi er að dvelja lengur við það.
Kristín er ánægð með Sigurð og spyr hvort fólk sé ekki orðið of gjarnt á að kalla allt afskiptasemi. „Sem foreldri þætti mér vænt um að fólk sýndi börnum mínum þá umhyggju að hvetja þau til að nota hjálm ef á þyrfti að halda. Það þarf þorp til að ala upp barn eins og máltækið segir.“ Steingrímur og Margrét eru ekki ánægð með þessa innkomu Kristínar í umræðuna og segja að um sé að ræða hótanir en ekki ábendingar.
Jakob kemur svo sterkur inn en hann segir ekkert, heldur setur inn hlekk úr atriði úr Fóstbræðrum sem hægt er að sjá hér fyrir neðan.