Unnar, íbúði í smáíbúðarhverfinu, er ekki sáttur eftir að hann fór út að leika með litlu dóttur sína. Í nágrenni leikvallarins taldi hann 40 sígarettustubba á jörðinni.
Unnar segir fara út að leik á hverjum degi með konu sinni og litlu dóttur þeirra. Hann segir frá reynslu sinni inni í hópi hverfisbúa á Facebook.
„Á hverjum degi förum við konan mín út að leika með litlu dóttur okkar. Vinsælustu staðirnir eru leikvöllur milli Bústaðavegar og Hólmgarðs auk almenningsgarðsins milli Hólmgarðs og Hæðagarðs. Á leikvellinum taldi ég um 10 sígarettustubba, í almenningsgarðinum rúmlega 30. Viljum við hafa þetta svona?,“ spyr Unnar.
Soffía var fljót að svara spurningu Unnars. „Nei, alls ekki,“ segir Soffía. Og Dýrfinna þekkir vandamálið vel af eigin raun. „Ég geng stundum í Grundargarðinum Þar er ég líka stundum að þrífa stubba og bjórdósir og jafnvel matarleifar,“ segir Dýrfinna.
Ekki tóku allir íbúar vel undir færslu Unnars. Það undrast Sigurlaug. „Ótrúleg viðbrögð við þessum pósti, eiginlega bara dónaleg …Sem sagt ef það eru ekki týndir kettir og hundar þá þarf ekki að tala um það,“ segir Sigurlaug.
Ólafur er ánægður með umræðuna. „Það er bara ekkert að því að kvarta undan svona viðbjóði og benda á þetta. Ég tala nú ekki um þar sem börn eru að leik,“ segir Ólafur.