Gamli útrásarvíkingurinn og fyrrverandi bankastjóri Glitnis, nú Íslandsbanki, Bjarni Ármannsson, segir í tilkynningu að „eftir umfangsmikinn fréttaflutning af deilum mínum við skattyfirvöld og málaferlum síðastliðin tíu ár þætti mér vænt um að fjölmiðlar kæmu eftirgreindu á framfæri: Með úrskurði Hæstaréttar í gær (nr. 21/2022) var sakaskrá mín loksins hreinsuð.“
Hann bætir við að „dómurinn staðfesti það að mér hefði verið gerð tvöföld refsing, fyrst í skattamáli sem gert var upp að fullu og síðan í refsimáli vegna sömu mistaka við gerð skattframtala. Mannréttindadómstóll Evrópu úrskurðaði að sú málsmeðferð gengi í berhögg við Mannréttindasáttmála Evrópu og hefur Hæstiréttur nú staðfest það.“
Bjarni er því kátur:
„Ég fagna þessari niðurstöðu og því að réttlætið hafi sigrað að lokum. Það hlýtur hins vegar að teljast umhugsunarefni að opinbera kerfið hafi með öllum tiltækum ráðum eytt meira en áratug í afneitun sinni á hinu augljósa.“