Haraldur Eiríksson, veðurfræðingur segir skúraleiðingar og vætu ríkja víða um land í dag, föstudag. Svalt verði áfram yfir helgina með rísandi hita á sunnudag. Hiti verður á bilinu 7 til 10 stig víðast hvar en svalast verður nyrst á landinu. „Já, morgundagurinn verður nokkuð svalur,“ segir Haraldur um laugardaginn en vindlaust verði á Suðurlandi. „Þó munar litlu á milli landshluta.“
Þá vildi veðurfræðingurinn lítt kannast við snjókomu á norðurhluta landsins og sagði 3 – 5 stiga hafa ríkt á Akureyri í nótt. „Það snjóaði ekki á Akureyri í nótt. Hins vegar var enn kaldara fyrir norðan fyrir fáeinum dögum síðan og grámaði á morgnana og víða á heiðum og fjöllum. En það er nú vonandi úr sögunni.“
Sólarþyrstir tístu um snjókomu í höfuðborg norðursins nú í þessari viku og sagði Halldóra Birta þannig frá hráslagalegu útsýni fyrir norðan á Twitter þann 16. júní sl. og deilir Kjartan Sverrisson í svari sínu ljósmynd frá Vopnafirði þar sem fönn fellur til jarðar. Haraldur veðurfræðingur segir hlýrra orðið og að ekki sé von á hreti í júní. „Nú er kominn 18. júní,“ svaraði hann fyrirspurn blaðamanns þegar tístin voru borin undir sérfræðinga Veðurstofu nú í morgun. „Þessi vika var ansi köld og þessum kulda verður ekki spáð á næstunni.“
Vopnafjörður pic.twitter.com/ECSfTUZmSW
— Kjartan Sverrisson (@Kjartans) June 16, 2021
Hverju megum við reikna með í júlí mánuði? Haraldur veðurfræðingur segir Veðurstofuna gera vikuspá og lítið að marka lengri framtíðarhorfur í veðurmálum. Er von á hlýrra veðri og geta Íslendingar lagt lopapeysuna frá sér á næstunni? „Þetta er að fikrast upp á við. Það verður væntalega hlýrra í næstu viku. Enda hlýtur að koma sumar fyrr eða síðar hjá okkur hér á landi, næsta vika lítur alveg þokkalega út. Helgin er bara svona, það má reikna með skúrum víða og vætu um allt land á morgun, eitthvað eimir þó eftir af skúrum á sunnudag en það verður voða lítið eftir af þeim.“
Vill veðurfræðingur með þeim orðum meina að hægt verði að líta til sólar í næstu viku? „Jah, það á nú reyndar að ganga lægð yfir landið á mánudag og þriðjudag og þá verður ekki mikil sól í kortunum en það lítur betur út þegar líða tekur á næstu viku.“
Helgarspá Veðurstofu má lesa HÉR