Íbúar Vesturbæjarins í höfuðborginni hafa áhyggjur af því að eitrað sé fyrir hundum í hverfinu. Grunur þeirra beinist einna helst að rottueitri og hefur þetta verið tilkynnt til lögreglunnar á höfuðborgarsvæðinu.
Það er Rósa nokkur sem sendir inn viðvörun í hverfishóp Vesturbæinga á Facebook. Þar segir hún:
„VARÚÐ gæludýraeigendur! Það lítur út fyrir að einhver hafi reynt að eitra fyrir hundi sem var útí garðinum sínum hér í hverfinu. Má til með að láta ykkur vita af þessari grunsemd, veit ekki meira í bili…Bið fyrir hundinum að það verði í lagi með hann,“ segir Rósa.
Sandra þakkar kærlega fyrir ábendinguna. „Eitthvað sem allir hafa gott að vita af: Ef hundur fer í rottueitur sést það strax. Það byrjar að blæða úr augunum þeirra og þá á að gefa þeim strax k-vítamín og fara með upp á dýraspítala,“ segir Sandra.
Sara er í sjokki en hún hefur sjálf upplifað þetta með hundinn sinn í hverfinu. „Þetta er hrikaleg mannvonska. Hundurinn okkar dó eftir að hafa étið svona eitur á Víðimel fyrir nokkrum árum. Innyflin tærast upp og þeir deyja úr innvortis blæðingum. Sársaukafullur og hægur dauðdagi,“ segir Sara.
Margir íbúar lýsa undran sinni á þessu og spyrja Rósu hvort hún hafi tilkynnt til lögreglunnar. „Já takk, lét lögregluna vita, eigandinn/ dýralæknir þarf að tilkynna málið, veit ekki meir… vonum það besta fyrir hundinn og fjölskyldu hans,“ segir Rósa.