- Auglýsing -
„Viðræður við FFÍ standa enn yfir hjá Ríkissáttasemjara og niðurstaða liggur ekki fyrir ennþá,“ segir Ásdís Ýr Pétursdóttir, upplýsingafulltrúi Icelandair, um yfirstandandi samningalotu flugfélagsins við Flugfreyjufélags Íslands, FFÍ.
Í gær fór fram sextán klukkustunda samningafundur milli samningsaðila en þeim fundi lauk rétt fyrir klukkan tvö í nótt. Nefndirnar komu síðan aftur saman í hádeginu í dag og hefur Aðalsteinn Leifsson ríkissáttarsemjari staðfest að ágreiningsmálum milli aðila hafi fækkað þó viðræðurnar séu enn þungar.
Næstkomandi mánudag stefnir Icelandair að hefja hlutfjárútboð til bjargar félaginu og hefur Bogi Nils Bogason forstjóri ítrekað sagt að þá þurfi að liggja fyrir samningur við bæði lánadrottna félagsins sem og flugfreyjur.
Hvorki Aðalsteinn ríkissáttasemjari né Ásdís Ýr upplýsingafulltrúi hafa viljað staðfesta að samningar séu nálægt því að vera í höfn. Þrátt fyrir tilraunir þess efnis náðist ekki á Guðlaugu Líney Jóhannsdóttur, sitjandi formann FFÍ, við vinnslu fréttarinnar.