Vigdís Hauksdóttir, oddviti Miðflokksins í borgarstjórn Reykjavíkur, telur enga ástæðu til þess að hún biðji Dag B. Eggertsson borgarstjóra afsökunar á þátttöku hennar í myndbandi. Á myndbandinum hefur Bolli Kristinsson kaupmaður beðist afsökunar þar sem hann fór fram á að myndbandið yrði fjarlægt.
Bolli Kristinsson kaupmaður, sem framleiddi myndband um Dag borgarstjóra, er nú iðrandi og hefur beðist afsökunar á birtingu þess. „Flest er rétt með haft en ein alvarleg rangfærsla hefur komið fram, að Dagur B. Eggertsson hafi keypt þrjú bílastæði af borginni án útboðs, þetta er rangt og þar sem mitt nafn er í kredit-lista í lok myndbandsins bið ég borgarstjóra og aðra aðila málsins afsökunar,“ skrifar Bolli á Facebook-síðu hópsins Opnum Laugaveg og Skólavörðustíg.
Í ljósi þeirra mistaka sem Bolli viðurkennir og að búið sé að biðja afsökunar á rangfærslum í myndbandinu segir Vigdís það ekki skjóta skökku við að hún sem borgarfulltrúi hafi tekið þátt í verkefninu. Aðspurð hvort hún sjái eftir þátttökunni eða hvort hún vilji biðjast afsökunar á henni hafði Vigdís þetta að segja: „Fyrir hvað á ég að biðjast afsökunar? Ég biðst ekki afsökunar á því og er stolt af því að geta lagt lið með rödd minni. Fréttamenn lesa fréttir, ég er ekki ábyrðaraðili að myndbandinu. Ég ljáði rödd mína verkefninu. Ég fékk ekki greitt fyrir það og gerði þetta í sjálfboðavinnu því ég styð málstað kaupmanna og aðila á Laugaveginum. Fólk gerir hins vegar mistök á hverjum einasta degi og ég tek ofan fyrir Bolla að biðjast afsökunar en það breytir ekki megin stefinu að borgarstjóri hefur tryggt sjálfum sér þessi bílastæði, Fjölmiðlar verða að taka afsökunarbeiðnir gildar, hvenær er nóg nóg?“ spyr Vigdís.