Melinda French Gates, fyrrverandi eiginkona eins ríkasta manns heims, Bill Gates, tjáði sig í fyrsta skipti um skilnað þeirra hjóna í viðtalsþætti Gayle King, CBS This Morning í morgun. Vinátta hans við barnaníðinginn Jeffrey Epstein var partur af ástæðu þess að hún sótti um skilnað.
Melinda og Bill Gates voru gift í 27 ár og eiga þrjú börn saman en skildu í fyrra. Margir hafa velt sér því fyrir sér hver ástæðan var að Melinda sótti um skilnað, hún hafi í raun haft allt það sem peningar geta keypt. Nema eitt, eins og fram kom í viðtali Gayle King við hana í morgun. Það er ekki hægt að kaupa traust. Bill hefur viðurkennt að hafa haldið framhjá henni einu sinni en sögusagnir um fleiri framhjáhlaup hafa verið á sveimi. „Það var ekki eitthvað eitt augnablik eða einn ákveðinn hlutur sem gerðist. Það kom bara sá tími að ég áttaði mig á að sambandið var ekki heilbrigt og ég gat bara ekki treyst því sem ég hafði,“ sagði Melinda. Aðspurð hvort Bill hafi haldið oftar framhjá henni sagði hún að það væri spurning sem Bill þyrfti sjálfur að svara.
Þá sagði Melinda einnig í viðtalinu að eitt af því sem varð til þess að hún sótti um skilnað hafi verið vinátta Bill við barnaníðinginn Jeffrey Epstein. „Mér líkaði það ekki að hann hitti Jeffrey Epstein, nei. Ég sagði honum það skýrt,“ sagði hún og bætti við að hún hafi hitt Epstein „nákvæmlega einu sinni“ því hún vildi sjá hverslags maður hann væri. „Ég sá eftir því um leið og ég gekk inn um dyrnar. Hann var viðbjóðslegur. Hann var illskan í mannsmynd. Ég sárvorkenni þessum konum,“ sagði Melinda og átti þá við fórnarlömb Jeffrey Epstein.
Vanity Fair fjallaði um málið í dag.