Grunnskólakennari og vinsæll tónlistarmaður, sem kemur meðal annars fram sem trúbador, er sakaður um nauðgun gegn þremur konum. Viðkomandi var settur í leyfi í skólanum um áramót án þess að á því væru nokkrar skýringar gefnar samkvæmt heimildum Mannlífs. Eftir því sem Mannlíf kemst næst snúa tvær kæranna að meintum nauðgunum árið 2019 og sú þriðja tengist eldri atburði.
Tónlistarmaðurinn hefur sinnt kennslu í grunnskóla á höfuðborgarsvæðinu og er enn skráður sem starfsmaður viðkomandi skóla. Þar hefur hann hins vegar ekki sinnt kennslu á önninni. Heimildir Mannlífs herma að hann hafi verið talsvert vinsæll meðal nemanda skólans.
Trúbadorinn og kennarinn sem nú er sakaður um þrjár nauðganir er fjölskyldumaður. Mannlíf ræddi við kennarann sem fullyrti að hér væru á ferðinni upplognar sakir. „Ég er fórnarlamb vinkvennahóps. Allt sem ég get sagt við þig er að það er verið að hópast gegn mér og ljúga upp á mig,“ segir viðkomandi. Tónlistarmaðurinn vildi ekki veita viðtal vegna málsins.