Ökumaður var stöðvaður í austurborginni vegna gruns um að hann væri ekki allsgáður. Augu lögreglumanna beindust síðan að farþega bifreiðarinnar sem grunaður er um sölu og vörslu eiturlyfja auk þess að vera vopnaður. Tekin voru sýni úr ökumanninum og honum sleppt en farþeginn var læstur inni í þágu rannsóknar málsins sem beinist að broti á lyfjalögum og vopnalögum.
Ofbeldisseggur var handtekinn á svipuðum slóðum vegna líkamsárásar. Hann var í þannig ástandi að ekki var hægt að taka af honum skýrslu og bíður þess í fangaklefa að það rofi til hjá honum svo skýrslutaka geti farið fram.
Mikið var um ölvunarakstur um allt höfuðborgarsvæðið í nótt og náði lögreglan að hafa hendur í hári nokkurra þeirra sem þannig ógnuðu samborgurum sínum og voru mikil umsvif við sýnatöku hjá hinum grunuðu. Þetta var nótt hinna drukknu og dópuðu ökumanna.
Lögreglan gerði skyndikönnun á almennu ástandi ökumanna. 19 bifreiðar voru stöðvaðar á umferðarpósti þar sem athugað var með ástand og ökuréttindi. Allir þeir ökumenn stóðust kröfur og uppfylltu skilyrði um réttindi til aksturs.