Willum Þór Þórsson, nýr heilbrigðisráðherra, segir að hann hafi áhyggjur af Omicron-afbrigði kórónuveirunnar; næstu dagar og vikur komi til með að leiða í ljós hverjar afleiðingar þessa nýja afbrigðis verða fyrir heiminnn.
Willum er spurður hvort að COVID-19 væri búið; svaraði hann því til að það hefði verið afar ánægjulegt fyrsta verk í embætti heilbrigðisráðherra að fá að koma með þá yfirlýsingu, en því miður væri raunin önnur:
„Nei því miður, það væri nú skemmtilegt ef ég gæti hér á fyrsta degi lýst því yfir að COVID væri búið, en svo er ekki. En ég vil líka segja að bæði sá ráðherra sem var hér á undan mér, Svandís Svavarsdóttir, og sóttvarnayfirvöld – sem við köllum – Þórólfur, Alma og Víðir, hafa gert þetta vel hingað til og auðvitað þjóðin öll. Það er mjög mikilvægt að taka bara á þessum málum áfram að yfirvegun, skynsemi og læra eftir því sem við tökum skrefin.“
Einnig var kappinn spurður út í Omicron-afbrigðið; hvort hann hefði áhyggjur af því:
„Já auðvitað hef ég það á meðan við erum að afla upplýsinga um það hvaða áhrif það hefur. Við sjáum mjög skjót og harkaleg viðbrögð víða þar sem flugleiðum er lokað, og þar fram eftir götum, en við eigum eftir að sjá á næstu dögum og vikum hvaða usla þetta afbrigði veldur.“