2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Ananas í allt og á grillið

Ananas skorinn og skellt á grillið.

1. Athugið hvort ananasinn er tilbúinn, það er t.d. gert með því að toga í innstu blöðin á honum, ef þau losna frá án nokkurs afls ætti ananasinn að vera tilbúinn.
2. Leggið ananasinn á hliðina og skerið efsta og neðsta hlutann frá með beittum og fremur stórum hníf.

3. Látið ananasinn standa og skerið skinnið langsum frá, byrjið efst og skerið niður allan hringinn.

AUGLÝSING


4. Takið lítinn hníf og hreinsið restina af brúna hlutanum frá.

5. Sneiðið ananasinn þversum í sneiðar.

6. Skerið með litlum beittum hníf kjarnann úr miðjunni.

Fróðleikur um ananas
Ananas er hitabeltisávöxtur en það var Jean de Léry sem uppgötvaði ávöxtinn á 16. öld í Suður-Ameríku, nánar tiltekið í Brasilíu. Ananas var fyrst fluttur til Bretlands og svo til Frakklands þar sem hann var ræktaður í gróðurhúsi og kynntur fyrir Lúðvík XV Frakklandskonungi í kringum árið 1733. Ananas var dýr og sjaldgæfur í byrjun 20. aldar en er nú ræktaður víða um heim. Ekki eru ýkja mörg ár síðan ananas fór að fást ferskur hér á landi en hann var einkar vinsæll á 20. öldinni niðursoðinn í sykurlegi.

Til eru fjórar algengar tegundir af ananas en algengast er svokallað cayenne-afbrigði en það er safaríkt og mjög sætt. Ananas er tilbúinn til neyslu þegar hann er fremur þungur miðað við stærð og hefur sætan ananasilm. Einnig er gott ráð að athuga hvort blöðin á honum losna við minnsta átak, ef slíta þarf blöðin af er ávöxturinn líklega ekki fullþroskaður. Ananas er viðkvæmur og skemmist auðveldlega, því er best að neyta hans strax. Ananas geymist við stofuhita í u.þ.b. 1-2 daga en í ísskáp í 3-5 daga. Hægt er að frysta ananas en þá verður að skera hann (eins og á skýringarmynd) og frysta hann, t.d. í sírópi.

Þennan dásamlega hitabeltisávöxt er hægt að nota í marga rétti en algengt er að hann sé notaður í framandi eftirrétti og í kökur og oft er hann eldaður með reyktu kjöti, oftast svínakjöti. Ananas er tilvalinn ávöxtur á grillið, hann passar vel með kókós, kanil og möndlum, svo fátt eitt sé nefnt.

Myndir / Ernir Eyjólfsson

Ekki missa af þessum

Annað áhugavert efni