2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Djúpsteiktur camembert – klassík sem allir elska

Hver man ekki eftir djúpsteiktum camembert? Þessi réttur var mjög vinsæll á áttunda áratugnum og var þá gjarnan borinn fram sem eftirréttur en hann er líka tilvalinn sem forréttur eða smáréttur og á sérlega vel við á notalegum vetrarkvöldum. Hér kennum við ykkur hvernig á að gera hann en það er auðveldara en margan grunar.

Djúpsteiktur camembert – skref fyrir skref

2 camembert-ostar

100 g hveiti

AUGLÝSING


100 g brauðrasp

3 egg

½ -1 lítri grænmetisolía

Skerið hvorn camembert-ost í 6 bita. Setjið hveiti í plastpoka og ostinn í og hristið pokann svo osturinn hjúpist vel með hveiti. Sláið eggin saman í skál. Setjið brauðrasp í aðra skál. Dýfið ostinum í egg svo allar hliðar verði þaktar og veltið síðan upp úr raspi. Gerið þetta aftur, fyrst í egg og svo í rasp. Mikilvægt er að osturinn sé vel þakinn og engin göt á hjúpnum svo osturinn leki ekki út í olíuna þegar hann er djúpsteiktur. Hitið olíuna. Gott er að nota lítinn stálpott og olían þarf að vera 5-6 cm djúp. Óþarfi er að nota meiri olíu. Steikið ostinn og veltið honum varlega svo hann steikist á báðum hliðum, tíminn fer svolítið eftir því hvað olían er heit en hann á að verða gullinbrúnn. Berið fram með góðri rifsberjasultu.

Texti / Sigríður Björk Bragadóttir
Mynd / Ernir Eyjólfsson
Stílisti / Hanna Ingibjörg Arnarsdóttir

Ekki missa af þessum

Annað áhugavert efni