Hér kemur uppskrift að geggjuðu granóla með kókos. Við notum tröllahafra í þetta granóla en hafrar þykja sérlega hollir en þeir innihalda góð kolvetni, prótín og trefjar ásamt því að vera stútfullir af vítamínum og þá sér í lagi B og E-vítamínum og þeir innihalda töluvert magn af steinefnum.
Þrátt fyrir að vera kolvetnamiklir þá eru hafrar með lágan sykurstuðul, þ.e.a.s. þeir gefa góða orku í langan tíma án þess að blóðsykurinn hækki mikið. Hafrar eru líka mettandi og því er síður hætta á að við verðum fljótt svöng t.d. eftir að hafa borðað hafragraut. Hafrar hafa góð áhrif á meltinguna og regluleg neysla þeirra er talin hafa lækkandi áhrif á slæma kólesterólið í líkamanum.
Granóla með kókos
u.þ.b. 500 g
50 ml sólblómaolía eða jarðhnetuolía
70 ml hlynsíróp
300 g tröllahafrar
60 g graskersfræ
40 g sólblómafræ
40 g hörfræ
½ tsk. kanill
1 tsk. engifer, þurrkað
50 g kókosflögur, ristaðar
Hitið ofn í 180°C. Setjið olíu og hlynsíróp saman í lítinn pott og komið upp að suðu, látið malla í 2-3 mín. Setjið hafra, graskersfræ, sólblómafræ, hörfræ, kanil og engifer í stóra skál og blandið saman. Hellið olíublöndunni yfir þurrefnin og blandið saman þar til allt hefur samlagast vel.
Setjið bökunarpappír á ofnplötu og hellið granólablöndunni yfir, jafnið út með bakhliðinni á skeið og bakið í 35-40 mín., hrærið af og til í blöndunni yfir eldunartímabilið til að tryggja jafna eldun. Látið kólna og blandið því næst ristuðum kókosflögum saman við.
Geymið í loftþéttum umbúðum við stofuhita.
Hver er munurinn á granóla og múslí?
Helsti munurinn á granóla og múslí er sá að þegar granóla er útbúið er hráefnið bakað með olíu og oftast einhverri sætu eins og hlynsírópi eða hunangi sem gerir það stökkt undir tönn á meðan múslí er ekki bakað og inniheldur það oft hráa hafra.
Í nýjasta Gestgjafanum finnur þú meiri fróleik um hráefnið hafra og fleiri uppskriftir þar sem hnetur og fræ leika aðalhlutverkið.
Umsjón / Folda Guðlaugsdóttir
Stílisti / Hanna Ingibjörg Arnarsdóttir
Mynd / Hallur Karlsson
