2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Geggjaður kjúklingaborgari – dýrari týpan

Hamborgarar eru vinsælir á grillið enda fljótlegur og þægilegur matur. Algengast er að þeir séu gerðir úr nautahakki og ef hráefnið er gott þarf lítið annað að gera en að krydda með pipar og salti og málið er dautt. Það er hinsvegar gaman að breyta til og gera eitthvað nýtt og spennandi og hér höfum við útbúið frábæra kjúklingaborgara með skemmtilegu indversku ívafi.

 

Kjúklingaborgari með indversku ívafi
fyrir 4

3 kjúklingabringur (u.þ.b. 600 g), skornar í grófa bita
1 lítill rauðlaukur
2 hvítlauksgeirar, saxaður
2-3 cm biti ferskur engifer, mjög smátt saxaður
hnefafylli ferskur kóríander, saxaður
rifinn börkur af 1 límónu
3 tsk. túrmerik
1 tsk. karríduft
1 tsk. kumminduft
1-2 tsk. gróft sjávarsalt
1/2 tsk. nýmalaður svartur pipar

Setjið allt í matvinnsluvél og látið vélina ganga þar til allt er vel samlagað. Mótið 4 hamborgara og steikið á heitri pönnu eða grilli þar til þeir eru eldaðir í gegn. Berið fram með hamborgarabrauði, tómat-chutney, mangósósu og fersku grænmeti að vild.

AUGLÝSING


tómat-chutney:
4-5 stk. tómatar
1 tsk. svört sinnepsfræ
2-3 cm biti ferskt engifer, fínt saxað
1 tsk. paprikuduft
1-2 msk. balsamedik
3 msk. púðursykur
nokkrar chili-flögur

Hitið vatn í potti. Skerið kross í hýðið undir tómötunun og sjóðið þá í 1-2 mín. Takið þá upp úr og látið kólna aðeins. Afhýðið tómatana, hýðið ætti að vera laust frá eftir suðuna. Skerið þá í báta og takið mest af fræjunum í burtu. Saxið þá síðan vel. Hitið olíu í potti og steikið sinnepsfræ og engifer  í nokkrar mínútur. Bætið restinni af hráefnunum saman við ásamt tómötunum og látið þetta malla undir loki í 30-40 mín. Takið þá lokið af og látið malla áfram þar til maukið er hæfilega þykkt, það á að vera álíka þykkt og sulta.

mangósósa:
1 dós 18% sýrður rjómi
hnefafylli ferskur kóríander, fínt saxaður (má sleppa)
3-4 kúfaðar msk. mangó-chutney
1 tsk. karríduft
gróft sjávarsalt
nýmalaður svartur pipar

Blandið öllu saman og bragðbætið með salti og pipar.

Uppskriftir/Kristín Dröfn Einarsdóttir
Stílisti/Ólöf Jakobína Ernudóttir
Mynd/Hákon Davíð Björnsson

Lestu meira

Annað áhugavert efni